Su Casteddu at scioberau s’allenadori nou po s’annu chi benit: at essi Rolando Maran chi at bintu sa partida cun Ivan Juric e Davidi Nicola.
Maran est unu trentinu nasciu in su 1963 e de giogadori fut difensori. No at mai giogau in Serie A ma feti un’annu in Serie B, cun su Chievo Verona.
At incumentzau a fairi s’allenadori prus de bint’annus a imoi sighendu is piciocus de su Brescia, apustis airi fatu su numuru dus in su Chievo. at girau s’Italia, de susu a basciu e at allenau in is citadis de Cittadella, Bari, Trieste, Vicenza, Varese e Catania. Sa prima panchina de Serie A chi at tentu fut propriu cussa siciliana in su 2012 e cun Maran allenadori su Catania at fatu su record de puntus, cincuantases, in serie A. De su Catania est torrau a domu sua, podeus nai, su Chievo, ania giai de giogadori iat bestiu sa maglia po tregentustrinta bortas.
Cun sa scuadra de su presidenti Campedelli in is annus passaus, comenti de allenadori, at fatu bellus campionaus e is scuadras suas funt sempiri dificilis de ddue giogai contras. Beni beniu Maran, seus segurus ca su Casteddu cun tui giai non at abarrai a s’urtima partida po si sarvai.
Foto: bergamopost.it
