“Soi innoi po agiudai su Casteddu, su prus cantu possu”, custu est s’obietivu de Darijo Srna, su giogadori nou de su Casteddu chi eriseru at chistionau cun is giorronalistas.
Su difensori croatu at fatu sciri poita at scioberau sa Sardigna po sighiri a giogai a palloni. Prima de totu is cosas, at fatu sciri, po su presidenti Giulini ca est unu “piciocu cun sa conca a postu, giovunu e ambitziosu”, e finas poita at agatau “unu populu sempiri cun s’errisu in buca, gentili e chi ddi pragit su palloni” e po dd’acabai “po giogai in-d’una bella scuadra, in-d’una bella natzioni e in-d’unu bellu campionau che-i cussu italianu”.
Chena contai, in segus, is consiglius de amigus e collegas comenti Cop, Bruno Alves e finas Zola ca est amigu de Stanic cumpangiu de Srna in natzionali. “Ponei totu paris custas cosas e cumprendeis beni poita apu scioberau Casteddu e su Casteddu. Totu cussu chi tengiu abbisongiu in sa vida dd’apu agatau innoi”.
Foto: dailystar.co
