Sa Base, su movimentu politicu fatu nasciri de Efis Arbau, corantacuatr’annus, sindigu de Ollollai e abogau, intrat a fairi parti de su Psd’Az, e paris s’ant a presentai a is eletzionis regionalis de friargiu de s’annu chi benit. “Boleus fairi parti de unu progetu chi bincit”, at nau Arbau, non si podit nai ca non tenit arregioni castiendu is arresultaus chi at tentu su partidu de Solinas de candu est andau paris a sa Lega de Salvini. Est meda dificili a ddi nai ca non est beru.
Su sindigu de Ollolai non est sa prima borta chi fait chistionai de ssi. In su 2010 s’iat essi bofiu candidai a sa presidenza de sa Provincia de Nugoro cun su Partidu Democratigu, chi tandu fut su partidu cosa sua, ma is capus boliant Orrobertu Deriu. Arbau non fait passus a coa e nci benit bogau de su partidu paris a atrus democratigus de cussus logus. Si presentat a-i cussas eletzionis su matessi cun cussus de Italia dei valori, Birdis, RossoMori e Sel e totu sa campagna eletorali dda iat passada nendu ca su Pd fut unu partidu de dresta.
Foto: sardegnareporter.it
