Candu si giogat cun gana e barra is partidas si podint finas e perdiri ma calencua borta, finas chi prus debilis comenti de giogadoris de calidadi, si bincint beni e cun grandus meritus. Eriseru est sussediu in Firenze aunia s’est andau a giogai cun d’una scuadra cun giogadoris fortis e chi boliat binciri po andai in segus a si giogai totu cun su Milan in s’urtima partida. Invecias su Casteddu, fut ora, candu pariat ca sa serie B fut in palas de su corrunconi, at giogau una de is partidas prus bellas de totu s’annu e a s’acabu est bastau su gol de Pavoletti a sa fini de su primu tempus po binciri. At erriscau nudda e antzis podiat segnai atras bortas cun Farias e cun Pavoletti e totu. Cussu chi contat est airi portau a domu is tres puntus e imoi po non ci calai agiossu in s’inferru de sa serie B si depit binciri cun s’Atalanta dominigu chi benit in Casteddu. Imoi is piciocus de Lopez tenint a is palas sa Spal e su Crotone e propriu cust’urtima est cussa posta peus poita depit andai a giogai a Napoli e non ce ddu bieus su Napoli chi fait arregalus. Est ancora totu de giogai ma si podit castiai su benidori cun meda prus trancuillidadi.

 

 

 

Foto: calciomercato.it