Orrobertu Mancini, s’allenadori beciu de s’Inter, de sa Lazio e de sa Fiorentina in Italia, de su Manchester City in Inghilterra, de su Galatasaray in Turchia e de su Zenit in Russia, est s’allenadori nou de sa natzionali de palloni de s’Italia. Pigat su postu de Di Biagio chi po duas partidas iat sighiu is asulus contras de s’Argentina e s’Inghilterra in su mesi de martzu passau. Mancini teniat disigliu mannu de setziri in sa panchina de s’Italia e po custu si nd’est andau de su Zenit po torrai in cussa natzionali chi de giogadori no dd’iat donau totu is atentzionis chi unu giogadori bravu che-i cussu iat airi meritau.
Custu mengianu a mesudì at essi presentau e at a incumentzai a fairi connosciri su trabagliu chi at a bolli fairi. Po imoi non si fait perunu nomini de is giogadoris chi at a lamai po giogai cun s’Italia ma totus funt cunvintus chi unu at essi de seguru Balotelli ca cun Mancini at giogau innanti cun s’Inter e dapoi cun su Manchester City puru.
Foto: passioneinter.com
