Unu Casteddu timorosu non ce dd’at fata a si pigai is tres puntus contras de unu Bologna chi non tenit atru de nai a-i custu campionau. Is piciocus de Lopez ddu ant postu su coru e s’anima in su calori de su Sardegna Arena, ant tentu una bona pariga de ocasionis po fairi su gol ma non ce dd’ant fata. Lastima manna poita fut una partida de binciri po si nci stesiai, una borta po totus, de sa zona caglienti. Imoi is partidas chi ant a benni faint ancora prus a timiri, ma tocat a si ddas gherrai una a sa borta e a pensai ca po is atras scuadras puru no at essi facili e su Casteddu tenit su vantagiu mannu de tenni cuatru puntus in prus de chini imoi iat essi cundennada in Serie B, sa Spal de Semplici. De eriseru su Benevento de De Zerbi est un’atra borta in Serie B e su Verona chi giogat oi contras de su Genoa depit binciri po fortza chi no ddu bolit sighiri coidendu. Su Casteddu est a puntus ogualis cun s’Udinese e tenit a palas su Chievo de Maran, su Crotone de Zenga, chi eriseru est andau a binciri in Udine, sa Spal e su Verona.

Dominigu chi benit in Marassi contras de sa Sampdoria de Giampaolo un’atra partida importanti meda. Tocat a tirai a foras sa gana e sa barra po cicai de fairi calencunu puntu chi iat a serbiri che-i s’aria.

 

Foto: sport.sky.it