Custu merì, a is ses e mesu, torrat in campu, contras de su Genoa, su Casteddu in sa partida chi non si fut giogada su 4 de martzu po sa morti de Davide Astori. Sa partida est importanti meda po is piciocus de Lopez, difatis erribat a pusti sa “batosta” pigada dominigu passau cun su Torinu de Mazzarri. De sa partida non ant essi de seguru Farias, Han e Cigarini ca funt ancora infortunaus.
S’allenadori de su Casteddu, in s’atobiu cun is giorronalistas, at nau ca si depit torrai a partiri de su primu tempus giogau cun su Torinu. “Nemus ndi fueddat poita, in manera giusta, si comenti est andada a finiri sa partida – at nau Lopez – ma in su primu tempus eus tentu, una pariga de ias, s’ocasioni de segnai. Chi iaus segnau, forsis, fut cambiada sa partida. Est importanti meda a torrai inderetura in campu a pustis una “sonada” che-i cussa de dominigu”.
“Oi depeus giogai cun d’una scuadra meda forti, chi currit ma tenit finas calidadi manna in is peis de is giogadoris. Ballardini dd’apu tentu comenti allenadori, ddi bogliu beni, a issu e a totu cussus chi dd’agiudant, est capassu meda ma oi cun nosu at agatai pani tostau”, at sighiu a nai Lopez.
Foto: blitzquotidiano.it
