Est mortu in Roma, malaidu de tempus meda, su regista, unu de is prus mannus chi eus tentu, Vitoriu Taviani. Teniat otantot’annus. Cun su fradi Pàulu at fatu film chi ant abarrai is sa storia de su cinema italianu: Padre Padrone (chi iat bintu sa Prama de oru a Cannes in su 1977), La Notte di San Lorenzo, Caos, Cesare deve morire (Ursu de oru in Berlino). A ddu fairi sciri a totus est stetia una de is figlias, Giuanna. Taviani at essi cremau e non c’at essi perunu interru, aici boliat e aici at a fairi sa familia sua.
Vitoriu Taviani fut nasciu in San Miniato, in sa provincia de Pisa su binti de cabudanni de su 1929. Cun su fradi Pàulu, de dus annus prus piticu, ant scritu aberu paginas chi non si ndi podint scaresciri de su cinema italianu. Dus Maistus chi de is annus sessanta, de su seculu passau, ant contau sa realtadi, sa storia e-i cussu chi no andaiat de s’Italia.
Figliu de unu abogau chi fut contras de su fascismu, Vitoriu at incumentzau in su 1962 cun Un uomo da bruciare, ddu e fut comenti de atori Giuanni Maria Volontè, e de tandu, sempiri paris a su fradi, non s’est mai frimau.
Foto: ilfattoquotidiano.it
