Si votaiat eriseru in Molise po is regionalis e at bintu su centrudresta. Meda a palas su centrumanca. Donato Toma cun su corantatres e mesu po centu est su presidenti nou de sa Regioni molisana. Andria Greco de is Steddaus est erribau segundu cun su trintotou po centu e Carrulu Veneziale, de su centrumanca, meda prus atesu cun su digiaseti po centu.

Po su Movimentu de is 5 Steddas non est unu arresultau meda bonu poita tocat a nai ca a is politicas de su 4 de martzu passau teniant cuasi su corantacincu po centu e invecias imoi feti su trintunu. Andria Greco, su candidau insoru, at, a donnia manera, fatu sciri ca “Non est beru ca eus faddiu, seus passaus de tenni dus consiglieris in Regioni a ndi tenni ses. Ses consiglieris chi ant portai sa bogi de su Movimentu e massimamenti po donai bogi a sa genti chi at cretiu in nosu”.

Toma puru at chistionau inderetura e a chini dd’at pregontau comenti ce dd’at fata a si fairi votai at nau ca “sa genti candu votat cun sa conca scioberat sa genti chi tenit gana de fairi e de nai non cussa chi morrungiat e bastat”.

 

 

Foto:altomolise.net