Fut su 12 de arbili de su 1970 candu su Casteddu de Gigi Riva bincendu contras de su Bari po 2-0 ( cun gol de Gori e de Riva), festaiat aici, unu dominigu innanti de s’acabu de su campionau, sa vitoria prus manna chi una scuadra de palloni possat tenni in Italia: campionis de s’Italia. Nau imoi parit unu contu de non creiri, invecias est sussediu deaveras e totu sa Sardigna festaiat cussu chi finas a tandu fainat feti is scuadras de su in pissu de Roma. De tandu funt passaus corantot’annus ma chini s’intendit sardu non s’at a podir mai schesciri cussus nominis chi ant fatu sa storia: Erricu Albertosi, Mariu Martiradonna, Giuliu Zignoli, Pieruluisu Cera, Comunardo Nicolai, Peppi Tomasini, Angilu Domenghini, Nenè, Sergiu Gori, Ricciotti Greatti, Gigi Riva, Mariu Brugnera, Cesari Poli, Corradu Nastasio, Eraldu Mancin e Adrianu Reginato.
Mai si fut erribau a tanti e mai, de seguru, s’at a podiri erribai, propriu po custu tocat a si dd’arregodai sempiri e a no ddu fairi schesciri a is prus piticus chi imoi bint feti is scuadras mannas e chi bincint de prus. Una borta at bintu finas su Casteddu, chi fut sa scuadra, comenti oi etotu, de totu sa Sardigna.
