Is partidus chi funt intraus in Parlamentu ant scioberau is capustruma. Po su Partidu Democratigu a sa Camera at essi Gratzianu Delrio e a su Senau su rentzianu Andria Marcucci. “Boleus provai totu paris a donai unu signali de scuadra, s’unidadi tra nosu depit essiri sa cosa prus importanti po cicai de fairi is cosas beni”, at nau su segretariu Mauritziu Martina.
Fortza Italia, invecias, at a tenni Anna Maria Bernini in Palatzu Madama, chi po una dî at finas bisau de essiri sa presidenti de su Senau, e a Montecitorio sempiri una femina, custa borta una de is prus connotas: Mariastella Gelmini ca in is annus passaus at fatu su ministru de s’Istrutzioni, dd’ant batiu is manus a forti sotu su centrudresta.
Is Steddaus ant a tenni Giulia Grillo a sa Camera e Danilu Toninelli a su Senau. Di Maio at chistionau nendu ca ant fatu unu trabagliu aberu mannu.
Sa Lega de Salvini at postu Giuannicarrulu Giorgietti a sa Camera e Giuannimarcu Centinaio, comenti in sa legisladura passada, po su Senau.
In is trumas amesturadas is capustruma funt de Liberus e Ogualis: Fideli Fornaro a Montecitorio e Loredana De Petris a Palatzu Madama.
