“Ti torraus gratzias de totu, tui fus po nosu sa lugi, tui ses su giogu de palloni comenti pragit a is pipius, su figliu e su fradi chi totu nosu iaus bolli tenni”. Aici at chistionau su cumpangiu de scuadra Milan Badelj fueddeundu cun Davide Astori in s’ora de sa missa de custu mengianu in Santa Croce. At ligiu una litara de scrita de totu is cumpangius de sa Fiorentina: “Non scias chistionai atras limbas ma ti faias cumprendiri de totus poita tui chistioanias cun su coru, custa non est cosas po totus”.
Innanti de Badelj at chistionau su fradi de Astori, Marcu, chi prangendu at nau: “Non ci funt medas fueddus de nai, naraia sempiri a Davide ca candu ddu intervistaiant narat sempiri is propius cosas, duncas facu deu puru sa propia cosa. In custas dîs nos eis fatu cumprendiri cantu beni boliais a fradi miu”.
Prassa Santa Grugi s’est prena de genti: tifosus, genti de dogna tipu, piciocus e piciocheddus erribaus po saludai s’urtima borta su giogadori mortu dominigu passau in su sonnu.
Su baullu de Astori est partiu de Coverciano po si frimai una pariga de minutus in su Stadiu Franchi e dapoi est erribau in Prassa Santa Grugi aunia a is degi est incumentzada sa missa cun totu is autoridadis de sa citadi de Firenze e de su mundu sportivu e de su palloni.
Una borta acabbada sa missa in Firenze su corpus de Astori est partiu a sa bidda sua, San Pellegrino Terme, aunia cras su 9 de martzu at essi interrau.
Foto: calciomercato.com
