Peruna novidadi, totu comenti si narat ainnanti: Vladimir Putin est un’atra borta presidenti de sa Russia. Est sa cuarta borta in dogi annus po su “Zar”, e custa borta ce dd’at fata a binciri cun-d’una percentuali chi fait a timiri: su setantases po centu. Numurus chi iant a pragiri a prus de unu politicu ma feti Putin e pagus a trus si podint permitiri.
In sa noti genti meda est andada a ddu festai. “Soi unu de sa scuadra de bos atrus, una scuadra forti cun genti a milionis”, at nau su presidenti chistionendu in denanti a is “tifosus” sûs. “Bos si torru gratzias medas po m’airi agiudau – at aciuntu Putin – e in custu arresultau, aberu mannu, biu ca ddu est genti ca at cumprendiu eita eus fatu, e non fut facili a ddu fairi, e ddu est puru sa gana de tenni una sperantzia po su benidori. Deu possu feti impromintiri ca eus trabagliai ancora de prus, cun conca e cun coru”.
Putin at finas fueddau de cussu chi est sucedendu cun is ingresus e massimamenti de Skripal: “Est de macus a pensai ca ddu eus avelenau innanti de is eletzionis e de is Mondialis de palloni”.
Foto: timemagazine.it
