Non ce dd’at calada Mariu Balotelli a si biri unu nieddu che-i cussu eligiu in su partidu de sa Lega.
Su giogadori de su Nizza, chi in Italia at giogau po su Milan e s’Inter, at scritu in Instagram po si dda pigai cun Toni Iwobi, s’omini de sessantadus annus nigerianu, primu omini nieddu a brincai is scaleris de Palazzo Madama comenti de senadori.
Balotelli, in su profilu cosa sua, at postu una fotografia de su senadori nou in cumpangia de Salvini, totus a dus cun dd’una maglieta aunia si ddue ligit “Stop invasione”, e ddu at scritu “Forsis soi tzurpu deu o forsis non si dd’ant nau ancora ca est nieddu. Bregungia!”.
Inderetura at arrespustu su segretariu de sa Lega: “Balotelli non mi pragiat candu giogaiat e mi pragit prus pagu candu chistionat”. Prus adduru est erribada finas s’arrespusta de su senadori Toni Iwobi: “Non bogliu chistionai de Balotelli imoi, non mi ndi frigat nudda de cussu chi at scritu o de cussu chi narat. Bogliu pensai a-i cussu chi depu fairi comenti de senadori e po sa Lega. Issu est unu grandu giogadori e at abarrai sempiri aici”.
Foto: goal.com
