In Sardigna po Pasca s’angioni non podit mancai in is mesas. Prus o mancu at essi aici po seti sardus de degi e nd’ant a papai a su mancu trintamila cust’annu puru. Totu custus numurus funt una cica de sa Coldiretti chi narat puru ca in s’Isula funt su 65% pascius in terra sarda, numuru meda prus basciu cunfrontau a sa produtzioni natzionali, aunia sa petza erribat massimamenti de sa Romania e de sa Grecia.
“Comperendu s’angioni de Sardegna Igp – narat su presidenti de Coldiretti Sardegna Battista Cualbu – si pigat un’angioni de calidadi e si connoscit beni de aunia erribat, eita papat e comenti est pesau”. Dda pensat a sa matessi manera Luca Saba, diretori de Coldiretti Sardigna: “Depeus imparai, de candu funt piticus, sa genti nosta a scioberai beni cussu chi papant. Sa calidadi prima de dogna cosa, cun sa cosa de papai e cun is traditzionis non si brullat. Massimamenti in Sardigna”.
Foto: nonsolocucineisolane.blogspot.it
