Torrat su carrasegare casteddaiu, e torrat cun duas novas: at essi prus longu e no at essi feti in Casteddu ma in Pirri puru. S’est partiu dominigu passada cun s’ispetaculu a s’auditorium de prassa Dettori “Maschere di Carta”. Torrant puru, comenti unu tempus, is sfiladas: sa prima s’otu de friargiu, giobia rassu, candu sa sfilada de mascaras partendu de su cursu Vittorio Emanuele at lompiri in totu su centru storicu casteddaiu. Sa segunda su degi de friargiu etotu, in Pirri custa borta, candu a is cuatru e mesu duas trumas de mascaras ant a partiri de orruga Santa Maria Goretti e de orrugra Chiesas po s’atobiai in s’orruga Salvo D’Acquisto.
Sa di pusti sa sfilada pirresa un’atra in Casteddu in su centru istoricu: partendu de su Cursu s’at a fairi su giru in is orrugas Manno, Garibaldi, Sonnino, Largu Carlo Felice, Prassa Yesse, Stampace po poi torrai a su Cursu.
S’urtima sfilada, cussa de martis rassu, su 13: custa borta si partit de prassa Giovanni XXIII e candu s’at a erribai in orruga Santa Margherita s’at abrugiai su Rei Cancioffali.
Su carrasegare casteddaiu acabat dominigu 18 de friargiu cun sa Pentolaccia: a i degi e mesu sa Vespiglia, a is cincu de merì in su Villagio de is piscadoris sa festa cun tzipulas po totus.
