Est sa Saras de is fradis Moratti s’atzienda prus errica chi teneus in Sardigna, difatis in su 2016 at tentu godangius po 5,9 miliardus de eurus. A su segundu postu un’atra sociedadi sempiri de is fradis Moratti, sa Sarlux chi at tentu 814 milonis de intradas. Funt custus is numurus de una cica in pissu de is cincugentus realtadis prus importantis de s’Isula. Custa cica dd’ant fata su Cerved, chi est una sociedadi chi trabagliat in su campu finantziariu e s’universidadi de Tatari.

Su tertzu postu de sa classifica est de sa cumpangia de is aereus Meridiana, su 49% de is atzionis de su mesi de cabudanni est de su Qatar, in su 2016 ddi funt intruaus 391,3 milonis de eurus. Sempiri po is trasportus de biri is numurus de sa Tirrenia: setima cun 235 milionis de intradas.

Sa cuarta positzioni est de su Bancu de Sardigna spa cun 368 milionis, sa cuinta de Isa cun 301 milionis, sa sesta po Abbanoa cun 287. Tiscali s’agatat po se undigi cun 176 milonis, a se digiotu sa Fluorsid de su presidenti de su Casteddu Giulini.

Is cincugentus atziendas pigadas in contu ant faturau in su 2016 cuasi digiaseti miliardus e sa parti manna dd’ant fata cussas chi tenint a eita biri cun servitzius e telecomunicatzionis ca cun 103 atziendas aant faturau dus miliardus e mesu. Interessu mannu finas po cussus chi manigiant cosa de papai: 61 atziendas e 1,1 miliardu de intradas.