“Po cust’Isula nosu naraus ca sa zona franca est su meglius chi si possat fairi, is sardus depint difendiri sa specialidadi propria”. Aici at fueddau su capu de Fratelli d’Italia, Giorgia Meloni, eriseru in Casteddu po sa campagna eletorali. “Chi sa Sardigna benit posta in is cunditzionis de si dda podiri gherrai cun is atras regionis italianas non at a tenni nudda de timiri”. Innanti de fueddai a suta de su palatzu de su consigliu regionali sa Meloni est andada a rendiri bisita a sa genti chi bivit in Sant’Elia: “Apu chistionau cun sa genti chi ddue bivit, apu pregontau poita is politicus non si ddue acostiant e m’ant arresputu ca timint a ddue andai de cussas partis. Deu nau ca sa politica non depit timiri a si fairi biri in perunu logu, poita sa genti ti podit imparai calencuna cosa chi tui non scis”.
At chistionau, comenti de sempiri, finas de is migrantis chi erribant de s’Algeria e de sa Tunisia e at acrariu cali est sa positzioni de su partidu sû: “Eus giai nau a bogi arta, tres annus fait, s’erriscu mannu chi in mesu a medas de custus chi nd’erribant ddu est calencunu terrorista puru. De meda annus ddu naraus e in su mentris sa manca abarrat citia”.
Foto:www.occhiodisalerno.it
