Sirviu Berlusconi si torrat a setziri in sa scrivania de Porta a Porta aunia digiaseti annus a imoi iat postu sa frima suain su cuntratu cun is italianus. Est sa matessi scrivania de tandu: “Mi setzu e soi emotzionau, custu documentu si intzerriata ‘Impignu cun is italianu’”, incumentzat su presidenti beciu de su Guvernu.
“Deu, Sirviu Berlusconi, in sa vida mia apu fatu trabagliai genti meda, a milionis. Un’omini de su fairi che mei si ponit a dispositzioni de s’Italia e de totu sa genti po insighiri a ndi bogai a pigliu trabagliu po totus. Pusti sa vitoria de is eletzionis de su 4 de martzu, chi est segura, deu ap’essi a su costau de su Presidenti nou po dd’agiudai. Aintru de s’acabu de sa prossima legisladura tengiu comenti de obietivu cussu de portai sa genti chena trabagliu in Italia a suta de sa media de s’Europa”, narat Berlusconi indenanti de is telecameras, aici comenti iat fatu in su 2001.
“Issu – at nau Berlusconi chistionendu cun Brunu Vespa – mi ddu at a podiri betai in faci candu disigliat”. In su studiu televisivu ddi pregontant comenti mai segundu sei imoi si possat fairi cussu chi non ce dd’at fata a fairi candu fut presidenti e Berlusconi, cun s’errisigeddu in is lavaras at arrespustu: “S’atra borta non teniaus unu programa cumunu, funt sucedias cosas chi non si podit creiri. Custa borta teneus su programa craru e custu nos at agiudai”.
Foto di: ilpost.it
