Una partida in su sinnu de su Var e de s’arbitru Tagliavento. Su Casteddu ndi torrat in Sardigna cun dd’unu puntu chi podit andai meda beni po comenti si fut posta sa partida. Po tres bortas s’arbitru s’at castiau su Var e no nd’at intzertau manc’una: candu at donau unu rigore a su Crotone, candu nc’at bogau a Pisacane e candu non at donau unu gol a Ceccherini de su Crotone.

A s’incumentzu, sa partida fut giogada cun trancuillidadi e, finas a su rigore de Trotta chi at fatu andai a innanti sa scuadra calabresa, funt pagus is tirus in porta.

Pusti su gol de su Crotone su Casteddu at giogau de prus e Cordaz, su portieri calabresu, nd’at bogau una pariga de bocias de sa porta sua.

Sa partida s’est decidia totu a s’acabu de su primu tempus, prima cun d’una traversa de Nalini, poi cun Tagliavento chi c’at bogau a Pisacane, e duncas cun su bellu gol de Cigarini.

Cun custu paregiu dd’est andau mali a sa scuadra de Zenga a brincai sa scuadra sarda, dominigu chi benit un’atra partida de grandu importantzia: a is tres cun sa Spal.