Marcu Santamaria teniat corantatres annus, Giuseppu Setzu, de origini sarda, ndi teniat corantanoi, Arrigo Barbieri invecias cincuantotu. Funt is tres operaius mortus eriseru in sa Lamina de Milanu in-d’unu de is incidentis in su trabagliu prus mannus de is urtimus annus. Un’atru, Giuannicarlu Barbieri, fradi de Arrigo, s’est sarvau ma est in perigulu de vida: est erribau chena cumprendiri e cun su coru firmu in s’ispidali San Raffaele de Milanu e is dotoris dd’ant atacau a una machina po ddu tenni in vida. Atrus dus, Alfonso Giocondo de corantot’annus e Costantinu Giampiero de corantacincu funt abarraus in s’ispidali ma si podit nai ca funt sarvus. Unu de is mortus, Arrigo Barbieri, fut su responsabili de sa produtzioni.
Sa Lamina est stetia secuestrada po is indaginis. Dus is magistraus chi trabagliant a sa cica de sa beridadi: Titziana Siciliano cun Gaietanu Ruta. Bolint cumprendiri comenti est possibili a morri in su trabagliu in su 2018. Parit ca sa curpa de sa morti de is tres operaius est su gas, massimamenti s’azoto. Comenti si fait in custus casus inderetura ant essi postus in su registru de is indagaus su responsabili legali de s’atzienda e is responsabilis de sa seguresa.
