Parint cosas fatas is comporas de su Casteddu de atrus dus giogadoris pusti s’erribu in Sardigna deCastan. Charalampos Lykogiannis, tertzinu grecu de 23 annus chi giogat in su campionau austriacu cun su Sturm Graz e Damir Ceter, colombianu de bint’annus iant depiri fairi su prus acoitu is visitas medicas.
Eriseru un’atru passigeddu po su grecu (innanti de cussu in Sardigna ant giogau Oikonomou e Katergiannikis), difatis in sa partida amichevoli chi si depiat giogai a Marbella no at giogau e tenit puru su cuntratu chi ddi scadit a maiu. Su grecu andat a fairi prus forti sa parti de sa difesa paris a Castan chi est giai prontu po custa dominiga puru a giogai.
Atra compora, chi parit cosa fata, est cussa de Damir Ceter chi erribat de su Quindio e est costau a su presidenti Giulini tres milionis de eurus de pagai in dus annus prus unu bonus de atru mesu milioni chi at a giogai unu numuru de partidas e at a fairi calencunu gol. Su colombianu at a giogai candu mancat Pavoletti ca comenti su livornesu est un umeda forti in su giogu de conca.
