A sa Sardegna Arena bincit sa Juventus ma chi su Casteddu iat paregiau no ndi iat furau ndda antzis. Is piciocus de Lopez ant giogau una bella partida fendu sunfriri e a timiri is biancunieddus, chi ant bestiu una maglia groga, chi, in dogna manera ant bintu sa partida cun-d’unu gol de Fideli Berardeschi.
Su gol chi at decidiu sa partida est erribau a sa mesora de su segundu tempus cun Pavoletti chi fut a terra e cun su Casteddu chi pediat chi sa bocia fut fuliada a foras: un’atzioni de Costa in mesu a Farias e Padoin, bocia a Bernardeschi chi dda spingit in sa porta sarda.
Su Casteddu protestat po unu rigori chi s’arbitru no at bidu, pusti su gol Bernardeschi etotu at tocau sa bocia cun-d’unu brassu. Su presidenti de su Casteddu, Giulini, at aboginau meda a forti po si fairi intendiri de totus: “Oi, at nau a is giorronalistas, non podeus giogai sa partida poita non si donant unu rigori craru a totus. Non est de creiri a no ddu biri, est foras de dogna logica: Calavrese podit sbagliai puru, ma Banti a su Var non si ddu podit non nai.”
In su primu tempus sa Juventus nd’at boddiu dus palus cun Dybala e sempiri Bernardeschi. Palu finas po su Casteddu candu su portieri juventinu at tocau su tiru de Farias. Pagu ainnanti su propiu portieri nd’iat bogau de porta unu corpu de conca de Pavoletti. Imoi duas cidas de ferias e pusti at a benni a giogai in Sardigna su Milan de Gattuso.
