Imoi si podit nai a bogi arta: Damir Ceter e Charalampos Lykogiannis funt dus giogadoris de su Casteddu. Eriseru ant firmau su cuntratu cun sa scuadra de Giulini e ant abarrai in Casteddu finas a su 2022. Su giogadori colombianu erribat de su Quindio e cust’annu at giai fatu 14 gol in 24 partidas giogadas, est nasciu in su 1997 e s’est pesau in su Universitario Popayàn. S’annu passau at giogau in sa natzionali Under20 inis campionaus sudamericanus po is giovunus e at fatu 2 gol in duas partidas.

Est su segundu giogadori colombianu de sa storia de su Casteddu, su primu est stetiu Ibarbo e at tentu comenti allenadori unu chi at connotu, po pagu tempus a nai sa beridadi, sa terra de Sardigna: Gregorio Perez.

Is primus fueddus de Ceter a pusti airi firmau su cuntratu funt meda craras: “Soi innoi po sighiri a cresciri, apu nau inderetura ca eia candu est erribada sa porposta de su Casteddu, po totu is giogadoris colombianus est unu bisu a erribai in Europa e in Italia. Non soi unu de cussus centravantis chi giogant feti in area ma mi pragit a giogai unu pagu apetotu, sempiri indenanti a donnia manera”. At a tenni in sa maglia su numuru binticuatru.