Est erribau eriseru in sa capitali sarda su segretariu de sa Lega Matteo Salvini. Est beniu finas a innoi po fairi su acordiu cun su Partidu Sardu e ddu ant nau a sa stampa a metadi mengianu in s’hotel Regina Margherita atobiendu is giorronalistas. Pusti Christian Solinas, su segretariu de su Partidu Sardu, ddu at acumpangiau a su mercau de Santu Benedetu po atobiai is citadinus e po calencunu smurzu. A ora de prandiri fut in su Poetu po atobiai genti chi ddu tenit in su coru.
“Comenti de Lega soi cuntentu meda de cussu chi m’est sussediu in su mercau, non podia betai passu ca totus mi firmanta po mi pediri calencuna cosa. Po mei, prus de s’arresultau de su 4 de martzu, est una cosa tropu bella a essiri intrau in su coru de is sardus”.
Is candidaus de su Partidu Sardu cun sa Lega ant essi de seguru Solinas po su Senau, Lorenzu Palermo e Antonello Peru in is collegius de Nugoro-Aristanis e Tatari-Terranoa.
