Pusti airi perdiu cun sa Juventus, sa dì innanti de sa Befana, su Casteddu non ce dd’at fata a fairi puntus mancu cun su Milan. Sa partida pariat posta in calada dopu su gol de Barella, agiudau de Donnarumma, ma poi dus gol de Kessiè ant fatu girai totu bia su Milan. Bellas paradas at fatu Cragno, totu is duas is scuadras ant acabau sa partida in degi: s’arbtru c’at bogau prima Rodriguez e dapoi Barella.
Segundu Lopez su Casteddu iat airi meritau su paregiu finas chi at nau puru ca giogai contras de custu Milan fut meda dificili. Is sardus abarrant a binti puntus e funt a cuatru puntus de sa Spal chi est tertz’urtima. Dominigu chi benit, is piciocus de Lopez ant a giogai una partida meda importanti, a is tres de merì, a Crotone chi est dus puntus agoa e lastima manna non ant a podiri essiri de sa partida Barella e Pavoletti chi ant essi scualificaus po is cartellinus chi ant pigau propriu eriseru. Eus bidu, a donnia manera, ca is orrubiusasulus, candu parint mortus si ndi torrant a pesai coidendu e seus segurus ca de Crotone nd’ant torrai cun calencunu puntu.
