Su Casteddu at comporau un’atru giogadori pusti Castan, Likogiannis e Ceter: Tanieli Ragatzu de s’Olbia difatis eriseru at firmau unu cuntratu cun sa sociedadi de Giulini chi ddu acapiat finas a su 2021. Su piciocu cuartesu at abarrai, a donnia manera, in Terranoa cust’annu e s’annu chi benit puru e at a podiri giogai in su Casteddu de su campionau 2019-2020. Ragatzu s’est pesau comenti de giogadori propriu in sa scuadra de sa capitali sarda e pariat cosa perdia, pusti airi bestiu meda atras maglias (Gubbio, Verona, Pro Vercelli, Virtus Lanciano e Rimini), candu est erribau in Gallura. Invecias ce dd’at fata a torrai a ponni in pei una carriera chi podiat essiri unu pagheddu diversa.
Ragatzu at incumentzau sa vida de giogadori cun su Casteddu e ancora est cosa sua unu primau de importu mannu: est su giogadori prus giovunu chi at segnau in serie A bestendu sa maglia de su Casteddu! Fut s’undigi de arbili de su 2009 e at segnau in sa partida de su Casteddu cun sa Fiorentina. Cun su Casteddu at giogau 33 partidas e at fatu 4 gol e cun s’Olbia po imoi at fatu 57 partidas cun 22 gol.
