Un’atra partida perdia in domu ma custa borta gioghendu beni e cichendu de gherrai finas a s’urtimu e ndi bessit a conca arta. A nudda est serbiu su gol de Pavoletti ca iat postu in discussioni su risultau pusti is gol de Icardi e Brozovic, un’atru gol de s’argentino at donau s’acabu a dogna bisu de paregiai custa partida.
Diegu Lopez iat avertiu sa scuadra sua sa cida passada: “Donai croba ca cussus tenint una bestia indenanti”, teniat arregioni, difatis Icardi at fatu dus gol. Pustis sa partida s’allenadori a torrau a cunfirmai: “Eus donau a s’Inter una mesu ocasioni e inderetura nos ant fatu su gol, ddu depiaus stesiai de is urtimus sexi metrus, sa beridadi est ca Icardi est unu fuoriclasse”. Lopez est cuntentu de sa partida chi at fatu sa scuadra sua e torrat meritus mannus a s’Inter.
Sa prossima partida s’at a giogai dominigu chi benit a Bologna contras de sa scuadra de Donadoni chi est bessia, custu dominigu, a su costau de su Milan e de su Chievo, a su setimu postu de sa classifica.
