In su 2016 in Sardigna funt stetius giogaus 1,094 miliardus de eurus in is slot machine chi s’agatant prus che a totu in is tzilleris. Totu custu dinari est sa setima parti de sa Finantziaria de sa Regioni de s’annu passau. Fait a timiri aberu totu custu dinari fuliau e fait a timiri ancora de prus candu si fait sa media po dognunu de nosu. Su logu aunia si giogat de prus est Terranoa, in sa capitali de sa Gallura custu fitziu est prus presenti che in s’orrestu de s’Isula po su numuru de giogadas e po numuru de machineddas. In Terranoa si giogant in media 1536 eurus po unu totali chi de pagu brincat is norantadus milionis de eurus a s’annu mancari su redditu mediu est de dixiatetimila eurus. Su record abarrat fines chi benit amanniau su territoriu: in sa provincia becia de Terranoa-Tempiui dogna citadinu spendit in media 1101 euru. Sa Gallura parit aberu su Nevada finas candu si fait su contu de su numuru de is machineddas cunfrontas a is abitantis. Terranoa, difatis, est sa prima in sa classifica natzionali de is cumunus cun prus de cincuantamila abitantis cun 15 machineddas dogna milli abitantis. Finas su segundu postu abarrat in Sardigna: Tatari cun 12 machineddas. Pagu de no si vantai teneus, a dolu mannu.
