Pusti airi intendiu s’atra dî su Guvernadori de sa Bankitalia Ignatziu Visco eriseru est stetia sa borta de Fideli Ghizzoni, chi fut su numuru unu de Unicredit. De Ghizzoni s’aspetant indicus nous po sciri chi su ministru Maria Elena Boschi apat pressau po fairi comporai sa Banca Etruria a s’Unicredit. Visco, chi est abarrau chistionendu prus de doxi oras, at nau ca sa Boschi non at mai pressau Bankitalia po intervenni in Banca Etruria. Segundu Visco sa Boschi at chistionau cun Fabio Panetta ma non dd’at nau nudda in pissu de chistionis de viliganza.

Ghizzoni invecias at nau custu: “Su primu cuntatu chi Unicredit at tentu cun Banca Etruria est stetiu su primu de cabidanni de su 2014, po sa cica de genti chi boliat frincai dinari e nos est stetiu pregontau chi teniaus interessu a castiai unu dossier po intrai in Banca Etruria”. A s’acabu de sa chistionada at nau: “Su ministru m’at pregontau chi Unicredit iat pensau a intrai in Banca Etruria ma deu dd’apu arrespustu ca non ddi podia nai nudda”.