Iant nau ca cun sa diferentziada su de pagai po s’aliga si at essi abasciau, invecias sa Sardigna, chi est una de is prus bonas a diferentziai, est sa terra aunia costat de prus. Segundu una ghia de Cittadinzattiva in s’Isula nostra si spendit sa media de 363 eurus a s’annu. Sa tassa est aumentada de su 3,4 po centu cunfontas a su 2016 e sa media de s’orrestu de s’Italia est de 300 eurus, meda prus bascia. Casteddu est sa cittadi prus cara de totu Italia cun sa spesa de 549 eurus de media, a Nugoro sa cartella media est de 335 eurus, a Aristanis de 295 e a Tattari 272. Chi si castiat sa classifica de is regionis sa Sardigna est sa cuarta po spendiri de prus pusti sa Campania cun 418 eurus, sa Sicilia cun 396 e sa Puglia cun 367. Is regionis aunia si spendit de mancu funt su Trentino cun 197 eurus, Friuli cun 223 eurus e Basilicata cun 228.
