Po centutrinta operaius chi ant trabagliau in sa Legler e chi funt abarraus chena agiudus socialis s’oberint atras ‘enas gratzias a is politicas postas in campu de sa Regioni po is areas prus mali pigadas. Custu est cantu nd’est beniu a pigliu de s’atobiu de eriseru in Villa Devoto de su Comitau chi controllat aunia ddue funt rapresentantis de sa presidenza de sa Regioni, assessorau de su Trabagliu, agentzia Aspal e ominis de su sindacau Cgil, Cisl e Uil.

Su comitau, dirigiu de Giuanniluca Serra, chi trabagliat po su guvernadori, at decidiu de fairi un’atru atobiu pusti su 9 de gennargiu, dî chi est capassu siat aprovada sa Finantziaria, po biri beni is interventus.

“Aintru de cussas dîs – at nau Serra – eus a biri eita si podit fairi”. Sa vertentzia de custus trabagliadoris est de sempiri bista cun atentzioni manna de sa Regioni e dogna cosa chi si fait est stetia decidia paris a totu is partis chi gherrant. Bintises operaius funt stetius acumpangiaus a sa pensioni e imoi abarrat su problema de custus centutrinta operaius, parit ca in su celu de su benidori no ddue siat medas nuis.