Eriseru, pusti prangiu, su Casteddu at giogau sa partida de Coppa Italia contras de su Pordenone chi giogat su campionau de Lega Pro, sa Serie C becia. Non ce dd’at fata sa scuadra de Lopez a binciri cun sa scuadra friulana a pusti is noranta minutus de giogu. Partida perdia, forsis, prima de incumentzai poita su Casteddu at fatu giogai totu cussus chi faint is riservas dogna dominigu. Est bregungia a perdiri cun-d’una scuadra de Lega Pro ma su Pordenone no nd’at furau nudda e at bintu po dus a unu e imoi at andai a giogai a su San Siro-Meazza de Milanu contras de s’Inter. Po is nieddusbirdis ant seganu Sainz Maza cun-d’unu bellu tiru de foras de area e Bassoli cun d’unu corpu de conca, po su Casteddu invecias iat paregiau su capitanu Daniele Dessena. Is giogadoris imoi si depint scaresciri de custa partida, nascia mali e giogada peus, e depint ponni conca feti dominigu chi benit candu ant giogai cun su Bologna.
