Unu Casteddu de duas facis cussu chi s’atru merì at paregiau cun sa Sampdoria. Is primus binti minutus pariant un’inferru cun sa scuadra de Genova chi est andada a pissu de dus gol ma pustis, in su segundu tempus, cun-d’unu pagu de fortuna, ce dd’at fatta a paregiai. Sa fortuna est torrada in su primu gol de Farias ma ainnanti, in su primu tempus, iat lassau is sardus: difatis si funt strupiaus tres giogadoris e Lopez ddus at depius cambiai po fortza. Sa Sampdoria at fatu meda mali a su Casteddu cun dus gol de su centravanti Quagliarella, bellu aberu su segundu gol, e sa partida pariat acabbada. Invecias is sardus no feti ce dd’ant fata a paregiai cun Farias e Pavoletti ma a sa fini at provau de binciri una partida chi pariat nascia mali. Unu puntu chi fait bessiri su Casteddu a 17 puntus. Sa prossima partida est de-i cussas dificilis meda cun sa Roma de Di Francesco, sabudu chi benit a s’Olimpico.
