Corantacincu milionis de eurus impromintius in su mesi de austu po agiudai sa crisi de chini trabagliat in su monti, ma pusti cuatru mesis de sa manifestatzioni  de is pastoris in Casteddu non totu andat beni. “Su sessanta po centu – at nau Orrobertu Congia, delegau de su Movimentu pastoris sardus, a sa fini de s’atobiu de s’atru mengianu in Tramatza – is atziendas non at ancora erriciu nudda”. Eita si podit fairi po custu? Un’atra passada de morrungius, ma cun datas e logus ancora de decidiri. “Sa situatzioni – at nau sempiri Congia – cunfrontas a candu eus manifestau in austu est ancora peus, in medas aspetendu is finantziamentus impromintius si funt indepidaus po comporai su mangimi”. A s’atobiu de Tramatza funt in cincucentus pastoris chi pusti milli impromintzias funt ancora chena nudda e ant fatu sciri cussu chi est capitendu a chini trabagliat in is montis sardus.