“Cunfrontas a una calada de migrantis chi erribant de su mari, in s’Italia intrea, de su 33% in Sardigna is erribus, prus che a totu de s’Algeria funt artziaus”. Funt fueddus de su ministru de s’Internu Marcu Minniti. is numurus funt custus: in su 2015 funt erribaus 343 algerinus, in su 2016 invecias 1225 e in su 2017 funt 1929. Funt 143 is sbarcus de cust’annu, totus cun barchigeddas de nudda.

“In sa cuestura de Casteddu – at aciuntu su ministru – s’est trabagliau meda e beni, funt in otu cussus signalaus po airi favoressiu s’imigratzioni chena regulas e sa falsificatzioni de documentus”. Minniti, a donnia modu, non chistionat de caminus nous ma narat ca funt caminus chi funt prus fortis ma chi esistiant giai. Cun su numuru de is sbarcus calau aici meda, gratzias a su trabagliu chi est partius de su mesi de triulas erribant perou de prus de s’Algeria, comenti eus nau, e de sa Tunisia. Chi a is algerinus pragit prus su caminu sardu a is tunisinus pragit, invecias, cussu sicilianu.

Is fueddus de su ministru funt criticaus de Cappellacci: “Is sbarcus de is algerinus funt prus de su dopiu, bolit nai ca est un’irbagliu mannu de totu sa politiga de su centrumanca in custu tema”.