“Fustis gioghendu cun-d’una scuadra forti deaberus, ma custa est sa strada chi depus sighiri a fairi”. Custus funt is fueddus chi Diegu Lopez at umperau pusti sa partida de su Casteddu a s’Olimpico de Roma contras de is grogusorrubius de Di Francesco.
At perdiu su Casteddu po 1-0 ma is sardus ant giogau una bella partida cun barra e ant donau croba a totu. Lastima manna poita su gol est erribau candu pariat ca su Casteddu s’iat godangiau unu puntu, difatis sa Roma at segnau a s’urtimu segundu cun su difensori Fazio. Una docia frida a pagus segundus de s’acabu, pusti chi a s’incumentzu de su segundu tempus Cragno, su portieri de su Casteddu, iat parau unu rigori a Perotti. “Fut una partida dificili meda – at sighiu Lopez – ma candu teniaus sa bocia nosu depiaus fairi unu pagu meglius, tocada a giogai in profondidadi chena timiri de atacai”. S’allenadori uruguaianu at donau meritus mannus a Barella e Romagna: “Barella est in grandu forma, e si ddu poderaus a sa strinta. Issu e Romagna mi praginti poita trabagliant meda e funt agatendu continuidadi. Funt de portai a nomini po is piciocus de is giovanilis”. Cenarba chi benit a is noi oras mancu unu cuartu sa prossima partida, in Casteddu contras de sa Fiorentina.
