Su Casteddu pustis una bona pariga de partidas ce dda fait a binciri foras de sa Sardigna e ndi torrat cun is tres puntus de Udine. Partida preparada beni de s’allenadori sardu Lopez, is piciocus ant giogau beni meda e ant tentu ocasionis mannas po podir binciri cun prus gol. Unu de is meglius est stetiu Faragò chi cust’annu est fendu torrai in barras totu cussu chi s’annu passau naranta po issu. Su gol decisivu, cun s’agiudu mannu de sa difesa de s’Udinese, dd’at fatu João Pedro cun d’unu corpu de conca in su segundu tempus. Cun su coru e cun su giogu, chena timiri, sa scuadra de su Presidenti Giulini s’est assigurada sa vitoria e una cida de trancuillidadi. Sa partida de dominigu chi benit at essi unu pagheddu prus tostada, difatis at a calai a sa Sardegna Arena s’Inter de Lucianu Spalletti chi eriseru, bincendu cun s’Atalanta, at brincau a su segundu postu a is palas de su Napoli. Custu Casteddu perou non timit e non tremit e at a fairi de totu po ndi bessiri cun calencunu puntu.