Sa ritzeta de oe si dda contat una pitzoca ardaulesa, Lina. Tenimos pagu tempus poite issa tribballat in sas iscolas et essinde a tradu si tocat a non si istentare meda. Custa comente totus sas ritzetas sardas apartenet a sos imparos tramandados dae mama in fiza e contat comente si faet custu màndigu: sos culurzones de patata. Si cumponet de ingredientes pòberos, de cussu ite papare pòberu e antigu chi arrechediat su mìnimu, su chi sa terra nos zaiat.

 

Po bàtoro personas contamos deghe culurzones a persona e duncas  calculamos: mesu chilu de farra, mesu chilu de patatas, ozu ermanu, casu de arbeghe tratacasau, nebidedda, sale. Po primu si  tribballat sa farra cun unu pagu de abba tèbia e sale e si lassat reposare. Si ponent a buddire sas patatas e si passant in su ite mòlere sas birduras, a coa si cundint cun ozu ermanu callentau, sale, casu e sa nebidedda segada meda a piticu. Si procedet duncas comente a su sólitu po sa pasta prena, si faet un’isfoglia, si ponet su prenu a cutzerinos e si serrant de sa mannesa chi si praghet. Si coghent comente semper e si cundint cun bagna sémplice o de antunna o de sirbone.