Est creschida meda in custos annos in Codronzanu sa passione pro su cantu, sun bàtoro sos coros in custa comunidade de 1300 abitantes: Codrongianos, Cuncordu Codronzanesu, Madonna di Saccargia, Sos Coroneddos: dognunu at però cuntivizadu cantos diferentes.
Su Coro Codrongianus est naschidu ùndigh’annos faghet dae sa voluntade de su retore de tando don Angelo Demontis, amantiosu e cumpetente de musica, umpare a paritzos giòvanos appassionados at fundadu su primu grupu de ómines: presidente Gianfranco Casu. Sos cantos fin non solu religiosos e litùrgicos, pro acumpagnare sa missa, ma puru de sa traditzione sarda, logudoresa e nuoresa. Su grupu s’est fatu connoscher e at partecipadu a paritzas manifestatziones in meda biddas de Sardigna, ma puru in Roma in sa cheija de san Salvatore in Onda, inue b’est sa tumba de sa Veneràbile de Codronzanu Elisabetta Sanna, chi sos codronzanesos, e non solu, sun aisetende chi siat beatificada (custa est una tappa de totu sos coristas de bidda).
In custos annos calchi cosa est cambiada, su presidente est como Diego Budroni e sa ghiadora sa mastra Michela Uda, chi cun Simona Uda e Francesca Fadda sun sa cuota rosa de su coro. Sos cantantes sun vinti e non podiat mancare su retore padre Antonio Piga. In su mese de cabidanni de su 2012, su grupu at festadu Degh’annos umpare nòmene chi at dadu puru a s’abboju, inue an presentadu su primu cd intituladu A Nostra Segnora, cun cantos traditzionales ma puru inéditos iscritos dae sa mastra Michela, dae Nicoletta Pulina, chi dai sempre agiuat su coro, e dae sos coristas Luigi Carboni e Giovanni Fadda. Pro acumpagnare su coro Codrongianus, in custa die de festa, bi fin sos coros de Ossi e de Usini e a los aplaudire zente meda de Codronzanu e de sas biddas acurtzu.
Su Cuncordu Codronzanesu, presidente Giuseppe Pittui, est naschidu in su 2009 pro iniziativa de duos coristas de su coro Codrongianus, Luigi Betza e Giovanni Fara (contra e basciu) chi aiscultende contos e ammentos de sos mannos an ammanizadu una chilca subra sos cantos religiosos e litùrgicos sardos e latinoa de sas cunfrarias de Santa Rughe e de su Rosàriu (chi como no esistin pius), in particulare sos chi acumpagnaian sas funtziones de Chida Santa. An chilcadu e àpidu in su mastru Luigino Cossu s’isperiéntzia e sa bravura de su diretore chi lis at imparadu sa ténnica de su cantu a tenore. Cun Andrea Zucca, boghe, Giancarlo Cortis, mesaoghe, an formadu su coro. A da poi de duos annos de istùdiu e proas, agiuados puru dai sos “padrinos” Giovanni Puggioni e don Barore Saba, retore de Codronzanu prima e como de Ossi, oe su grupu si podet bantare de aer partecipadu a paritzas manifestatziones de cultura in Sardigna e in Roma; ma puru in Belgio in sos cìrculos sardos de Charleroi e Liegi e in su mese de santandria de su 2012 in cussos de Flenu e Hornu, inue cun don Saba su Cuncordu at presentadu sa missa in limba, impitende su logudoresu puru pro sos cantos chi in gènere faghet in latinu.
In su mese de bennalzu de su 2013, in su centru sotziale “Maria Canu”, su Cuncordu at presentadu sa publicatzione Contende in bidda, cumpletu de cd, cun s’agiudu de sa Cooperativa Antemys, s’Amministratzione comunale de Codronzanu, sa Provìntzia de Tàtari e finantziadu dae sa Regione. Su lìberu s’abberit cun sa presentatzione de su sìndigu Luciano Betza e sighit contende s’istória de su cantu a tenore in Sardigna e de s’isperiéntzia fata fintzas a oe dae su Cuncordu Codronzanesu, caminu fatu cun armonia e comente narat su nòmene, a cuncordu.
Su Coro Madonna di Saccargia, est unu grupu de trinta cantantes, sa mastra est Michela Uda agiuada dae Nicoletta Pulina, su presidente Cristian Budroni. Su grupu, non solu acumpagnat sas funtziones religiosas, chilchende e isperimentende sempre cantos e melodias noas, ma séberat puru àteras vias pro fagher acussiare a cheija sa comunidade de Codronzanu e in particulare sos giòvanos, e si potet narrer chi est reséssidu in custu intentu, in particulare cun duas cumèdias musicales, sa prima “Il Risorto”, fata s’annu passadu in Chida Santa pro contare sa Passione, sa Morte e sa Risurretzione de Gesu Cristu, s’àtera “L’Atteso”, a nadale de su 2012, pro ammentare sa nàschida de Gesusu. Sas cumèdias an atiradu tota sa bidda e in Santu Pàulu pagos fin sos codronzanesos chi mancaian. Sa zente at premiadu, cun sa preséntzia, su grande tribagliu (costùmenes, iscenografia) e sa delicadesa dei custas fainas, chi an tocadu su coro de sos paesanos chi an àpidu sa fortuna de las bider.
Su Coro Sos Coroneddos est cumpostu dae bator pitzinnos, sos fradiles Arca, s’edade issoro est tra sos 17 e 20 annos: Giuseppe sa boghe, Mariano sa mesa boghe, Mario su basciu, Nicolò sa contra. Sa passione a-i custos piseddos bi lis at dada sa famìlia, sa mamas de Orune e Fonne e sos babbos originàrios de Bultei, an sempre apretziadu e impreadu su cantu a tenore tìpicu de sa Barbagia. Sun pigados in su palcu, cuasi pro giogu, cumbidados dae su comitadu de Sacarza de su 2009, pro sa festa de sa Trinidade, sa pius importante de Codronzanu, dae tando in medas si sun abbistos de sa bravura dei custos piseddos, chi resessin sempre a incantare sa zente non solu pro sos cantos, chi iscrien sos babbos Gavino e Nino, ma pro sa meraviza de bider e aiscultare custos giòvanos chi a dies de oe aman su cantu pius antigu de sa traditzione sarda.
Ocannu, a Pasca, sos coros, totu umpare, an animadu sa Via Crucis, in sas carrelas de Codronzanu.
