Beranu 2012, naschet Idhoca.com, butega on-line sarda e internatzionale, laboratóriu de artisanos de sa comunicatzione impignados de sa gràfica chi an detzisu de bisionare e aparitzare maglieddas, adesivos, imprentas de Sardigna e Mundu. Unu modu pro s’afirmare cun limba e fantasia nostras. Non debbadas custu progetu naschet e creschet in Sardigna: sèberu pretzisu, de cussèntzia e identidade. Su fundadore Frantziscu Pala cun sos pitzinnos e pitzinnas chi faghen parte de custa truma minore an seberadu de lassare s’Itàlia e àteros istados de s’Europa e de istare in Sardigna, pro cumproare chi sas cosas si poden fàghere finas in custa terra, pro comintzare a fraigare su tempus benidore binchende su disisperu de su presente e iscumitende subra s’atualidade de sa cultura natzionale nostra in su cunsessu internatzionale.
– Idhoca.com, proite custu nùmene?
Pro calicunu istudiosu de linguìstica Idhoca est unu topónimu prenuràgicu chi benit dae su babilonesu illukku: perda rara, de valore mannu. Segundu sa paristória Idhoca est una reina nuràgica tramudada in roca. A nois importat su valore simbólicu de su nùmene, sa facultade mitopoiética sua. Cando chistionamus de mitologia sarda, sa zente s’ispantat o si ponet a riere. In sa natzione sarda b’at bisonzu de assaborare su piaghere de nos bisionare comente pòpulu de su mundu, de annoare s’idea chi sos sardos an de issos matessi. Sa cusséntzia est sa prenda prus manna. Idhoca est unu menhir eternale, si cherides lu podides bidere in sos padentes de Sardigna, oe puru.
-Ite sun sas lìteras chi azis impreadu in su logo?
Su logo de Idhoca.com est iscritu cun s’impreu gràficu de sas lìteras de s’alfabetu sillàbicu de sa Limba Inùktitut faeddada dae su pópulu eschimesu de sos ìnuit chi biven in terras governadas oe dae su Cànada (Nùnavut, Newfoundland, Làbrador, Quèbec, Terras de su Nord-Ovest, Yukon), de sos Istados Unidos (Alàsca) e Danimarca (Groenlàndia). Amus impreadu custu alfabeto ca dae su cunsideru e su rispetu de su minore torrat a nàschere s’ispera de unu mundu de paghe, amistade, justìssia e paridade intro sas natziones.
– Su giassu bostru est iscritu in Sardu e Inglesu…
Eja, ch’amus bogadu s’italianu. Su giassu est traballende bene, niunu at nadu nudda, sos clientes òrdinan sos produtos sena problema perunu. Custu puru est unu sinnu de importu: finas un’atividade cummertziale podet caminare impitende su sardu. Nois faghimus su mercadu, no est a si fagher mandigare, limbisticamente puru, dae issu etotu.
– Bos cramades artisanos de sa comunicatzione made in Sardìnia, cun cale sentidu?
Amus cherbeddos chi arrejonan in sardu, in su sentidu natzionale de custa paràula. Sas bideas sun sardas, traballamus cun frunidores sardos, curreris sardos e internatzionales. S’ispera nostra manna est de podere traballare luego cun produtores de maglieddas e de pabiros de imprenta sardos. Mancari s’atividade nostra tenzat passadas tecnològicas, semus artisanos: totu sas gràficas e produtos sun fatos a manu in Sardigna.
– Impreades colores eco-compatìbiles e intessiduras de calidade. Aparitzades cada magliedda in una iscatuledda de origami fata a manu cun paperi alimentare…
Est su chi cherimus trasmìtere. Idhoca.com est che unu péssighe, una pumata, una cosa bona nàschida in sa terra nostra. Sos sardos depen contivizare sos produtos comente custos: dae su Made in Sardinia moet s’isfrancadura natzionale nostra.
– In sa pàgina Facebook de Idhoca b’at malliedda internatzionale puru…
In sas comunidades virtuales de sas retzas sotziales sos pópulos e sas limbas issoro si poden connòschere e istudiare paris: una possibilidade chi si depet isfrutare pro su bene de totu sas culturas minetadas dae sos ordinamentos polìticos, limbìsticos e sotziales de sos istados.
Oe sas realidades locales sun prenas de modernidade, est a bìvere in bonas s’apartenèntzia dòpia: sas caraterìsticas locales sun ùnicas, tocat de las tramudare in realidades universales pro las fagher connòschere a su mundu. Sa cultura basca, otzitana, brètona, corsa o catalana sun nostras puru. O cudda de sos Istados Unidos ebbia si podet esportare?
– Sezis indipendentistas?
Emmo! Si cheres su bene de sa Sardigna lu depes èssere, chene duda. Cherimus afortigare sas possibilidades de autodeterminatzione de custa terra. Pro annos meda amus traballadu in sa polìtica ativa, fata de passiones mannas ma mescamente de istùdiu e propostas rigorosas. Oe semus impignados a faeddare de libertade, cusséntzia e cultura natzionale cun su recreu e s’ispaju. In s’Europa de sas natziones sena istadu chi s’acostan a s’autodeterminatzione polìtica, cultura, sport, limba e sentidu natzionale creschen semper umpare.
