Cantadores e amantiosos de poesia cantada si sun aunidos umpare in su Sótziu pro sa gara, nùmene chi faghet a cumprèndere s’idea insoro: tenner in contu sa tradissione antiga de imbentare versos a bolu, amparare custa sienda finas faténdela connòschere a sos pius pitzinnos e contivizare semper s’impitu de sa limba sarda in domo e foras de domo.

 

Sos amministradores de Bànari -bidda nadia de Barore Sassu, unu de sos cantadores de mezus fama de tota s’istória de sas garas de poesia- an atzetadu sa proposta de su Sótziu, aparitzende una gara poética in su salone de sas iscolas su 24 de maju. Sos duos cantadores pius pitzinnos -Zuseppe Porcu de Irgoli (27 annos) e Dionisi Bitti de Ulìana (31)- acumpanzados a deghile dae su tenore de Ula Tirso (Nicola Argiolas, Nicola Cossu e Gianfranco Frau) an dadu vida a un’isperimentu de gara, pius curtzita comente oràriu in cunfrontu a sas disputas in piata ma deghile gasi etotu a s’iscopu de la presentare a chie non nd’aiat intesu mai e a chie non nde teniat una connoschéntzia incumprida. Sa zente, acudida a Bànari finamentra dae sas biddas de acurtzu e dae Tàtari, at iscultadu in assentu e a sa muda sos duos poetas pitzinnos dae s’esórdiu a su tema (dolore e amore), dae sa duina a sa batorina e a sa dispedida e lis at tzocadu sas manos puru, paritzas bortas.

 

Su sìndigu Giampiero Cordedda -impignadu in àteru logu pro rejones urgentes, sa die de s’abboju, ma sustenidore sìncheru de s’idea dae sa prim’ora- fut rapresentadu dae s’assessora a sa Cultura Paoletta Farina, vice-sìndigu. Issa at nadu peràulas pienas de cunsideru pro sos poetas a bolu e pro sa tradissione raighinada de cantare in poesia chi própiu in Bànari at tentu una bandela nida che Barore Sassu. Sas biddas de afaca puru (Sìligo, Thiesi, Romana) at tentu poetas de fama che Gavinu Còntene, Antoni Piredda, Andria Nìnniri e Gavinu Piredda. Su poeta banaresu Ànghelu Porcheddu – distintu e famadu in sos cuncursos de poesia de meledu in limba sarda de sos ùltimos trint’annos- ammentende a Barore Sassu chi li fut amigu at resadu versos dìligos dedicados a sa poesia, intitulados Ghìami tue.

At ghiadu s’abboju Màuro Piredda, unu pitzinnu istudiosu de sa gara chi at dedicadu sa tesi de làurea a sos cantadores. In s’abboju banaresu Màuro at presentadu una relata subra sa figura de Barore Sassu in s’ammentu e in su coro de sos paesanos suos pius amantiosos de sa gara poética.