A trint’annos dae sa morte insoro, su professore e istudiosu de limbas Matteo Porru -amigu de ambosduos- intregat un’ammentu dìligu a su mastru istimadu Antoni Sanna (professore de limbìstica sarda in s’Universidade de Casteddu e poeta) e a  Anzeleddu Dettori (poeta e ghia de S’Ischiglia, rivista famada de limba, cultura e arte), mortos ambos trint’annos innanti de oe, in s’ierru de su 1981: tiu Anzeleddu teniat 85 annos, tiu Antoni 62 ebbia.

 

In 77 pàgines su professore Porru contat sa sustàntzia de vida e de òberas de custos duos isteddos de sa terra nostra, onoréndelos a deghile pro che los frànghere dae sa néula de s’isméntigu. Su lìbberu est istadu contivizadu dae un’àteru bonorvesu  operadore de cultura: Tore Fozzi, fundadore de sa domo de imprenta Editzioni Della Torre de Casteddu, isse puru amigu de tiu Antoni e de tiu Anzeleddu.

 

In custu trabagliu de sentimentu b’at paritzas poesias de Anzeleddu Dettori e Antoni Sanna e finas artìculos insoro e testimonias de àtera zente, poetes su pius. Un’istrina chi naschet dae sa mente ma tenet in su coro su significu sou pius profundu.