Caminat in is bias de Casteddu unu piciocu chi at bociu unu deus. Tenit sexi annus e no ddi praxit sa gherra. Ma at a depi gherrai etotu, in-d-unu mundu prenu de maia e bellesa. S’eroi de Campione!, sa série de light novel giaponesas ambientada tra sa Sardigna e sa natzioni de su Sol Levante, si narat Kusanagi Godo. Est un’istudianti macu po su baseball e at otentu su tìtulu de campioni, iat essi a nai de mortori de deus, po ai istochigiau sa divinidadi persiana Verethragna. Est de issa chi at pigau is poderis istremenaus chi tenit.
Godo podit pigai dexi formas diferentis: boi, camellu, cuaddu biancu, craba, sirboni, pilloni de fogu, bentu, giovunesa e gherradori. Est istétiu su fadu a ddi cambiai sa vida e imoi Godo at a depi acetai totu is isfidas chi is atrus campionis dd’ant a ponni. Non feti, at a depi gherrai cun is atras deidadis chi ant a bolli vengai sa morti de Verethragna. Sa série, iscrita de Jō Taketsuki e pintada de Sikorsky po s’editori Shueisha, est istétia adatada in-d-unu manga s’annu passau (is pinturas, in cussa ocasioni, fuant de Jirō Sakamoto) e ocannu est passada in sa televisioni in-d-una série anime.
De is ùrtimas dîs de làmpadas su cartoni animau dd’ant amostau in is televisionis giaponesas, in is retzas AT-X, BS11 Digital, Sun TV, Tokyo MX TV e TV Aichi. Sa ghia est de Keizou Kusakawa. Una bella pubblicidadi po s’ìsula nosta. Is contus chistionant meda de sa Sardigna e is puntadas funt trexi. S’urtima est bessia in is ùrtimas dîs de cabidanni. Sa chi acumpangiat Kusanagi Godo in is aventuras suas est una picioca italiana: Erica Brandelli, una biunda fedali sua – bella de averas – chi ddi fait furriai sa conca. Erica tenit su tìtulu de Gran Cavaliere de una sociedadi de maia chi tenit basi a Milanu: sa Bronze Black Cross. Is puntadas de Campione fait a ddas biri, cun is suta tìtulus in italianu, a su link http://www.ftfansub.net.
