Oe cunsizamos a sos amigos de Làcanas sos produtos de sa terra nostra, sa Sardigna. Fortzis non totus ischimos cantos e cales cosas genuinas  tenimos a portada de manos, semus bombardados dae sa pubblicidade, curiosos po sas cosas chi benis dae foras e medas bortas trascuramos su chi oe si tzérriat a km 0 e chi nos diat poder fàghere arresparmiare e papare cosas sanas, cun benefìtziu de sa salude e de s’economia.Una cosa intellizente est a promòvere su chi produimos, sos donos de sa terra e de su mare, faghìndelos connoscher e comporéndelos nois po primos. Gràtzias a s’impignu de medas pessonas oe podimos nàrrere chi nos semus faghinde istrada foras de s’Ìsula nostra e a bellu abellu semus resessidos a otènnere reconnoschimentos po calecuna de sas matérias primas comente sa cartzofa, casizolu de su Montiferru, botarga de Cabras e àteras. Faghimos oe unu màndigu meda semplice cun cartzofa e botarga, duo produtos tìpicos sardos.

 

Ingredientes po sos culurzones: simbula, arrescotu, perdusémene, ôs, sale e nughe muscada. Ingredientes po su cundimentu: cartzofa, butarga, perdusémene, ozu, azu.

 

Faghimos s’isfoglia po sos culurzones cun sìmbula e abba e unu pagu de sale o simula e ôs, in custu casu un’ou dogna chentu gramos de farra. Los faghimos cun su prenu solitu, arrescotu cun ou e perdusémene e los serramos comente cherimos, zeo apo seberau de los fàghere a mesuluna.

 

Su condimentu: in-d-unu pagu de ozu ermanu arrosolamos una sigulla de azu, una borta dorada la chirramos e rosolamos sa cartzofa segada a fitigheddas azunghinde calecuna cullera de abba caente po cumpletare sa cotura. Parte de custu cundimentu lu molimos po otènnere una crema e parte lu lassamus coment’est. Si coghen sos culurzones e di cundin in custa bagna, si cumpletat isparghinde in pitzu sa butarga a fitigheddas e su perdusémene segau piticu.