Juanne Maria ’e Cherchi fut unu poeta, unu poeta mannu, duncas a nàrrere chi est mortu est una de cuddas espressiones faddidas pronuntziadas chene bi ponner aficu ca sos poetas non mòrini mai. Su nùmene sou restat in s’istória de sa literadura sarda pro sa novidade de sos temas e de s’istile poéticu, sa delicadesa de metàforas e assimizos, s’originalidade de s’impignu artìsticu in matèria de ambiente e de bellesas naturales e finas pro su modu nou de cantare s’amore e pro sa finesa de su limbazu sou. Si ch’est andadu dae sos ojos nostros ebbia, sàpadu coladu, su 10 de maju.

 

Fut nàschidu in Uri in su mese de martu de su 1922. Fizu de famìlia pòbera, -su babbu fateit annos e annos de disterru in Nord Amèrica- mustreit donos naturales de bundu in iscola e sa mama, cossoinesa, lu fateit istudiare finas a sa làurea in matèrias literàrias. Pro calchi annu trabaglieit in iscola che professore de italianu e latinu ma in su 1953 benzeit candidadu a su Consizu Regionale cun su partidu comunista e sa zente lu voteit meda. Pro tres legisladuras (1953-1965, tando una legisladura duraiat bator annos) resteit in Casteddu, distinghéndesi pro impignu e pro calidade de assione polìtica.In sos annos Sessanta pubblicheit duas regoltas de poesias in italianu e pius a tardu finas in tataresu e un’istùdiu subra sos annos tataresos de Palmiro Togliatti.

 

A sa limba sarda torreit a sa manna a su comintzu de sos annos Noranta: in su 1991 imprenteit in Tàtari cun Chiarella A disora e in su matessi annu bincheit su Prémiu de Otieri cun sa poesia In s’oru’e su mare. In su 1993 besseit sa segunda regolta, In aterue, in su 1996 sa ’e tres, S’ora ’e sa chìgula. S’ùltims regolta, A borta’e die, est de su 2002.

 

Adiosu, amigu coriale e cumpanzu fidele in su chertu pro sa limba.