Sutzessu mannu pro sa de III editziones de su Prèmiu de Poesia in limba sarda “Su Casu”, organizada ocannu puru dae s’Amministratzione Comunale de Sindìa cun s’agiudu de sa Pro Loco e cun su coordinamentu de s’operadore de s’Ufìtziu de sa Limba Sarda de sa Provìntzia de Nùgoro.

 

Sa premiatzione est istada fata domìniga 16 de nadale in s’Aula de su Consìgiu Comunale de Sindìa, a sa presentzia de su Sìndigu e de sos àteros amministradores, de sa Giuria ghiada dae su Presidente Sandro Biccai chi teniat comente giurados Sarbadora Miscali, Augusto Piras, Vittòriu Pinna e Gigi Piu e dae sa zente de sa bidda.

 

At abertu sa premiatzione su saludu de su Sìndigu Frantziscu Scanu, chi at manifestadu sa cuntentesa manna sua pro custu prèmiu, ma chi no at cuadu sas dificultades mannas de agatare pro s’annu chi benit sas risursas finantziàrias pro sighire a organizare su cuncursu de poesia.

 

A pustis at leadu sa paràula su Segretàriu de su Prèmiu (e operadore de s’ Isportellu Linguìsticu)  Màriu Antiogu Sanna chi at presentadu sos datos de su cuncursu in sos tres annos de sa vida sua: 49 partetzipantes in s’annu 2010, 27 in s’annu 2011, 46 in su 2012, cun una minimada de sas ispesas de su 30% : sos premios dae su 2011 no sunt prus in dinare, ma in in produtos tìpicos sindiesos, ca custa politica permitit puru de agiudare s’economia de sa bidda.

 

In sa Setzione B- Poetas Locales, sos premiados sunt istados battor e ant tentu totus cantus petzi snnalatziones o mentziones: sinnalatzione pro Maria Antonietta Demartis cun sa poesia “Sa frommiga” e pro Deormiti Pisanu cun sa poesia “Notte de atunzu”; mentziones pro Frantziscu Chessa (famadu poeta sindiesu, binchidore de sas duas editziones de s’annu 2010 e 2011) chi ocannu at tentu sa mentzione cun sa poesia “Un ammentu de babbai” e pro Elettra Vidili cun sa poesia “Penas chi su coro m’atresetan”.

 

Su Presidente de sa Giuria, Sandro Biccai at crefidu aclarire sos mòtivos chi ant inditadu sa Giuria a non assignare pro ocannu su primu prèmiu in sa setzione de sos poetas locales.

 

In sa Setzione A- Poetas de Fora, ant leadu sas mentziones Anghelu Maria Ardu de Frussìo pro sa poesia “Frimmadi a pensare”, Giuanne Chessa de Torpè pro sa poesia “D’onzi ranu t’aporro”, Domìnigu Anghelu Fadda de Tiesi pro sa poesia “Si su chelu abratzamus”, Sarbadore Anghelu Murgia de Macumere pro sa poesia “Funtana frisca” e pro Vissente Piu de Nurri (chi no fiat presente a sa premiatzione) pro sa poesia iscrita in sa variante campidanesa “Su traballu in agonia”.

 

Su terzu postu in sa graduatòria est istadu assignadu a Antoni Sannia de Bortigale cun sa poesia “M’as torradu s’ispera”; su segundu postu Francu Piga de Romana (chi istat in Loiri-Portu Santu Pàulu cun sa poesia “Rimas”, Francu Piga non fiat presente a sa premiatzione ca fiat leande su primu prèmiu in Ossi.

 

Su Binchidore de s’editzione de ocannu est istadu Giuanne Gàvinu Vasco de Bortigale cun sa poesia “Mi lu naras?”, chi est istadu premiadu dae su sindìgu Frantziscu Scanu, pro isse est sa segunda binchida de su cuncursu de Sindia in tres annos.

 

At agabbadu sa premiatzione su saludu de su Consigeri Delegadu a sa Cultura Antoninu Oggianu chi at torradu gràtzias mannas a sos àteros Amministradores, a sos Dipendentes Comunales, a sos ex traballadores de sa Legler chi ant dadu un’agiudu mannu pro s’organizatzione, a sa Pro Loco e a s’Ufìtziu de sa Limba Sarda.

 

Sos premiados sunt istados premiados dae sos Amministradores Antoni Oggianu (Consigeri Comunale Delegadu a sa Cultura e “babu” de su prèmiu), dae Nicholas Mannu (Consigeri Delegadu a s’Isport), dae Ivana Delrio (Consigera Delegada a s’Istrutzione) e dae sos Giurados.

 

Unu cumbidu cun malvasia, drucches e pane casu sindiesos at agabbadu sa premiatzione de su terzu prèmiu de poesia.