S’atuale guvernu italianu
su muntonarzu sardu at iscobertu
siat in gruta che a chelu abbertu
Logudoro, Barbagia e Campidanu.
S’iscoria nucleare fora ’e manu
deven depositare, custu est tzertu:
tando, segundu su solitu espertu,
su mezus muntonarzu est s’isolanu.
Mancu custu podimus impedire
ca est su nostru destinu fatale
rifiutos anzenos ismaltire.
Prestu amus s’iscoria nucleare
umpare a calchi iscoria istatale
chi ’enit in Sardigna a istranzare
