S’inghìriu nostru oe si frimat in Ozastra, a Est de sa Sardigna, mentovada po su mare ispantosu e sos màndigos genuinos. Rica de traditziones e arregordada po sas féminas de rara bellesa, in Ozastra non b’at mere de domo chi non iscat fàghere sos culurgiones…

 

Chistionande cun calecuna de custas féminas mi ’enit de pentzare ca sos culurgiones naschen in su dna insoro. A abbaidare cussas manos, s’abarrat incantados de tanta abbilesa. Sa ritzeta naschet dae sa cultura agropastorale, in tempos antigos cando no esistian indùstrias a malaoza si depiat papare su chi sa terra cuntzediat in cuss’istajone.

 

Sos culurgiones naschen comente màndigu chi sas massàias aprontaian po sos ómines insoro, de manera chi issos los podian callentare in su sartu in sas perdas caentes. Naschen in-d-una istajone cando su late non fut prus saboridu meda, ma si podiat su matessi impreare po fagher casu. Su prenu de mesu – issu puru pòberu – si cumponiat de patatas buddidas e insaboridas cun azu, ozu ermanu, casu, menta sicada e nughe muscada po imbrombare sa patata. Ma sa bellesa de custa ispecialidade si mustrat in su serrare s’isfoglia cun-d-unu ricamu fatu dae manos lestras e sapientes. Sa bontade est cussa de sos ingredientes poberos,  valorizados cun aromas e erbas. A printzìpiu sos culurzones los coghian unu pagu e los incasaian in duos istratos de casu. Si sos originales sun gai, sos culurgiones si poden mandigare finas cun bagna. Sa chi si usat de prus est cussa de tamatas friscas, o puru de sirbone, de antunna ’era o porcinos.

 

Ingredientes:

po s’isfoglia: farra de trigu e farra bianca 00, metade e metade, abba tébia e sale c. b.

po su prenu: patatas buddidas in abba salida, ozu ermanu, azu, casu, menta, sale, casu tratadu, pagu de pìbere (si aggradat).

 

Modu de los fàghere:

Aprontare s’isfoglia tribballande bene sas farras cun abba e sale fine cantu bastat e lassare reposare. In su mentres aprontare su prenu. Buddire sas patatas in abba e sale, ispuligare e iscazare cando sun ancora caentes. In-d-una padedda pitica pònnere una tassa de ozu ’ermanu a caentare cun-d-una sigulla de azu, cando est dorau chirrare dae su fogu e azùnghere una cullera de menta sicada e unu tale de nughe muscada, assentare de sale. Cundire cun custu sas patatas iscazadas, azùnghere casu tratau a piaghere e assazare si andat bene de sale e de gustu. Fàghere un’isfoglia e segare discos de pasta de 5 cm de diàmetru. In dognunu assentare una cullera de cosa, prènere e serrare a su modu ozastrinu. Cundire comente bos aggradat e bonu apetitu. Si calecunu cheret collaborare po sos màndigos sardos mi cuntatet a custu nùmeru 327 8141991 o a s’indiritzu: icnos2@gmail.com