Pardulas o casadinas, in Sardigna funt unu ‘urche chi si acostumaiat a fàere in su periudu de Pasca Manna, in su mese de abrile. Sas pardulas si cumponent de casu frisu, aranzu e pasta violada, cosas meda semplices comente nois sardos…

 

Sa ritzeta chi presentamos oe, si dd’at lassada iaia mia, sa mama de mama: Annamaria Salaris de sa ‘idda ‘e Bauladu. De custa iaia tenzo arregordos de una infantzia gioiosa. Sas vacantzas mias ddas apo passadas sempere in domo sua e ònnia cosa chi dda riguardat mi faet torrare a su passau, cando ieo, pitzochedda pitica, ddi dumandaio de mi lassare faere sas cosas chi faiat issa.

Sos ritos de sa chida santa si sussighiant tra sacru e profanu, e unu de custos fuit sa preparatzione de sas pardulas. Sa chenabura, die de sa chida dedicada a su pane fatu in domo, iaiu assentaiat po sa pobidda una faschina de linna, cun arreighinas de modditzi. Su fragu de custa linna significaiat ca in domo fuit die de pane o ancora mezus de ‘urches. Cun meda precisione si cumintzaiat a trabballare sos ingredientes e sa pasta violada. De custa pasta si nde zaiat unu pagu a noi nebodes, po si tènnere bonos a unu chirru, ma s’istessa pasta serbiat puru po faere su cocoi ‘e prama, cun in pitzu sas pendulas, e s’angulla, unu puddighineddu de pasta cun aintro un’ou cotu a tostu.

Sa ritzeta

INGREDIENTES:

Unu chilu de castu friscu (fresa)

Duos os

Sa corza tratacasada de un’aranzu

Una cullera o duas de simbula

un’ispitzulu de tzafaranu

Chentu gramos de tzucuru

 

PO S’ISFOLLA:

500 grammos de simula

Abba cantu bastat

Una cullera de ozu ‘e procu

 

Preparatzione

Su procedimentu est meda facile. Si tratacasat su casu e si azunghent sos ingredientes. Si tribballat sa simula cun s’abba e s’ozu, si otenit un’isfolla. Si prenet cun su cumpostu e si ponet a coere in su forru, fintzas a cando sas parduleddas creschent e si assutant. Un’ateru modu de faere sas pardula est de cambiare su casu frisu cun arrescotu – o metade casu e metade arrescotu – in custa manera sas pardulas funt prus saborias.